Wednesday, August 29, 2012

Pehli Baar

Wrote a Hindi poem after a long time. Thought of sharing. Cheers!

'Pehli Baar'

Jab humne ek dusre ko dekha,
Kahin kisi bachche ne pehli baar Ma kaha hoga.

Jab humne ek dusre ko pehchana,
Kahin kisi gaon mein pehli baar bijli aayi hogi.

Jab humne ek dusre ko mehsoos kiya,
Kahin kisi naujawaan ko pehli tankhwa mili hogi.

Jab humne ek dusre ko samjha,
Kahin kisi garmi se tang rickshewale ko din ki pehli savaari mili hogi.

Jab humne ek dusre ke saath, saath phere liye,
Kahin kisi padhe-likhe ko bhagwan par yakin hua hoga.

Jab humne ek dusre ko chuwa,
Kahin kisi qaidi ko sukoon ki neend aayi hogi.

Jab humne ek dusre ko savara,
Kahin kisi musafir ne, zara rukkar, ghar basane ki thani hogi.

Jab hum ek dusre se bichchre,
Kahin kisi kavi ne apni kavita puri kari hogi.

*